ஓசன்னா! கிறிஸ்துவை உங்கள் இதயம் என்னும் நகரத்துக்குள்ளே வரவழையுங்கள்

"முன்நடப்பாரும், பின்நடப்பாருமாகிய திரளான ஜனங்கள்: தாவீதின் குமாரனுக்கு ஓசன்னா! கர்த்தரின் நாமத்தினாலே வருகிறவர் ஸ்தோத்திரிக்கப்பட்டவர், உன்னதத்திலே ஓசன்னா என்று சொல்லி ஆர்ப்பரித்தார்கள்."

 - மத்தேயு 21: 09 - 

இது குருத்தோலை ஞாயிறு; இயேசு கிறிஸ்து எருசலேமுக்குள் வெற்றிகரமாக நுழைந்ததை உலகம் முழுவதும் நினைவுகூரும் நாள். இன்றைய தியானத்தின் ஆரம்பத்திலேயே, இந்த வருகை ஏன் "வெற்றி" நிறைந்ததாகக் கருதப்படுகிறது என்று நான் கேட்கலாமா? இயேசுவின், இந்த மறக்கமுடியாத, வருகையை வெற்றிகரமான ஒன்றாகக் காட்டுவதற்குப் பல வரலாற்று மற்றும் சமூக-அரசியல் காரணங்கள் இருக்கலாம். இருப்பினும், 2026-ஆம் ஆண்டில் இந்தத் தியானத்தை வாசிக்கும் நம் அனைவருக்கும், இது எந்த அளவுக்கு ஒரு வெற்றிகரமான நிகழ்வாகத் தோன்றுகிறது? இது வெறும் வரலாற்று நிகழ்வின் நினைவுகூர்தல் மட்டுமே என்றால், இன்று நாம் ஏன் இதைக் கொண்டாடி மகிழ்கிறோம்? இதற்கான விடை இந்த வாரம் முழுவதும் நடக்கவிருக்கும் நிகழ்வுகளில் அடங்கியுள்ளது என்று நான் நினைக்கிறேன்.

இன்று காலை "ஓசன்னா" என்று பாடிய நாம், மிக விரைவில் பெரிய வியாழனன்று இயேசு தனது சீடர்களுடன் அருந்திய இறுதி இராப்போஜனத்தையும், பெரிய வெள்ளியன்று சிலுவையில் அவர் மொழிந்த ஏழு வார்த்தைகளையும், பாவிகளுக்காக உலகில் இடம்பெற்ற ஒரு தியாகத்தையும் நினைவுகூர இருக்கிறோம். இறுதியாக, உயிர்த்தெழுதல் திருநாளில் இயேசுவின் மகிமையான உயிர்த்தெழுதலைக் காணப்போகிறோம். இந்த வாரத்தில் நமக்கு முன்னால் ஒரு வெற்றியின் குருத்தோலையும், நினைவுகூருதலுக்கான அப்பம் மற்றும் திராட்சை இரசக் கிண்ணமும், தியாகத்தின் சிலுவையும் மகிமையின் வெற்றுக்கல்லறை ஆகியவையும் உள்ளன. இதனால்தான் இன்றைய வருகை ஒவ்வொரு விசுவாசிக்கும் வெற்றிகரமான ஒன்றாக அமைகிறது. இந்த ஒரே வாரத்திற்குள், கிறிஸ்து இயேசுவானவர் புகழ், சோதனைகள், பலவீனங்கள், கவலைகள், அரசியல் மற்றும் சமூக அழுத்தங்கள், விமர்சனங்கள், ஏமாற்றங்கள், துரோகம், மீறப்பட்ட வாக்குறுதிகள் மற்றும் வலி ஆகியவற்றின் மீது வெற்றி கொள்வதைக் காண்கிறோம். கிறிஸ்து இந்த இயற்கை மற்றும் மனித வாழ்வின் தர்க்கங்களுக்கும் பாதிப்புகளுக்கும் அப்பாற்பட்டவராக நிற்பதைக் காண்கின்றோம்.

இந்த உலகில் தனது பிறப்பின் நோக்கத்தை கிறிஸ்து வெற்றிகரமாக நிறைவேற்றுகிறார். எருசலேம் மக்கள் போரிலிருந்து திரும்பும் ஒரு அரசனை வரவேற்பது போல அவரை வரவேற்றாலும், இந்த பிரம்மாண்டமான வரவேற்பிற்குப் பிறகு, மக்கள் காணப்போகும் மிகப்பெரிய போரும் வெற்றியும் இன்னும் வரவிருக்கிறது என்பதை கிறிஸ்து நன்கு அறிந்திருந்தார். எனவே, எருசலேமுக்குள் அவருடைய நுழைவு உண்மையில் ஒரு வெற்றிகரமானதொன்றாகவே இருக்கின்றது; ஏனெனில் இந்த வெற்றி இன்றைய நாளைப் பற்றியது அல்ல, மாறாக இனி வரப்போகும் காரியங்களைப் பற்றியது என்பதை நாம் இப்போது உணர்கிறோம்.

இன்று, எருசலேம் நகரத்திற்குள் கிறிஸ்துவின் மறக்கமுடியாத வருகையை நாம் கொண்டாடும் வேளையில், நம் இதயங்களாகிய நகரத்திற்குள்ளும் அவரை மகிழ்ச்சியோடு வரவேற்போம். அவரை நம் உள்ளங்களுக்குள் அழைப்போம். புகழ், சோதனைகள், பலவீனங்கள், கவலைகள், சமூக அழுத்தங்கள், விமர்சனங்கள் மற்றும் ஏமாற்றங்களுக்கு எதிராக நாம் போராடும்போது, நமக்கு உதவுமாறு அவரிடம் வேண்டுவோம். ஏனெனில், அவர் அதே பாதையில் பயணித்தவர். ஒவ்வொரு பலவீனமும் எப்படி இருக்கும் என்பதை அவர் அறிவார். மீறப்பட்ட வாக்குறுதிகள் நம்மை எவ்வளவு தூரம் உடைக்கும் என்பதை அவர் அறிவார். நோய்களால் நாம் உடல் ரீதியாகவும் மன ரீதியாகவும் போராடும்போது அது எவ்வளவு வேதனையுடையது என்பதையும் அவர் அறிவார். 

"ஓசன்னா" என்பது தீமையின் மீது கிறிஸ்துவின் வெற்றியைக் கொண்டாடும் ஒரு திருவிழா; அதே ஓசன்னா நம் ஒவ்வொருவருக்கும் ஆண்டவராகிய இயேசு கிறிஸ்துவை நம்பி நம் வாழ்விற்குள் அழைக்க ஒரு நினைவுச்சின்னமாகத் திகழ்கிறது. அவர் நமக்காக ஒவ்வொரு போரையும் வெல்வார், நாமும் வெற்றி பெறுவோம்.

நம்முடைய தந்தையாம் கடவுளின் ஆசீர்வாதமும், மைந்தனாம் இயேசுக்  கிறிஸ்துவின் அன்பும் கிருபையும், பரிசுத்த ஆவியானவரின் சமூகமும் வழிநடத்துதலும், நம்மனைவரோடும் கூட இருந்து, நம்மை வழிநடத்துவதாக.

கிறிஸ்துவுக்குள் உங்கள் அன்பின்,

எபனேசர் பிறேமன் வீரசிங்கம்

"நீர் வாருமே 🎶"

by Bro. David Vijayakanth & Dr. Jacinth