ஒருவரிலொருவர் அன்பாயிருத்தல்: சீஷத்துவத்தின் ஒரு அளவுகோல்

நீங்கள் ஒருவரிலொருவர் அன்பாயிருங்கள்; நான் உங்களில் அன்பாயிருந்ததுபோல நீங்களும் ஒருவரிலொருவர் அன்பாயிருங்கள் என்கிற புதிதான கட்டளையை உங்களுக்குக் கொடுக்கிறேன். நீங்கள் ஒருவரிலொருவர் அன்புள்ளவர்களாயிருந்தால், அதினால் நீங்கள் என்னுடைய சீஷர்களென்று எல்லாரும் அறிந்துகொள்வார்கள் என்றார்.

(யோவான் 13: 34 - 35)

 "அன்பு" என்ற வார்த்தை எதிலாவது இடம்பெறும்போது அது கேட்பதற்கு எளிதாகவும் நிம்மதியாகவும் இருக்கலாம். ஆனால் உண்மை என்னவென்றால், ஒருவரை உண்மையாக நேசிப்பது அவ்வளவு எளிதானது அல்ல. அது சொல்லப்படுவது போல லேசான காரியமும் அல்ல. ஒருவரை நேசிப்பதற்கு மிகுந்த முயற்சி தேவைப்படுகிறது. அன்பு என்பது தானாகவே நிகழ்ந்துவிடுவதில்லை. ஒருவரை நேசிப்பதற்கு மனித விருப்பமும், பிரயாசமும் அவசியம். அதனால்தான், இன்று நமக்கு நெருக்கமான நண்பர்களும் பிரியமானவர்களும் கூட, நாம் அவர்களை முதன்முதலில் சந்தித்தபோது வெறும் "ஹாய்", "ஹலோ" என்று சொல்லிக்கொள்ளும் அந்நியர்களாகவே இருந்தார்கள். அதற்குப் பிறகுதான், நாம் ஒருவர் மேல் ஒருவர் அன்பு செலுத்தத் தொடங்கினோம்!

கர்த்தராகிய இயேசு கிறிஸ்து நமக்கு ஒரு புதிய கட்டளையைத் தரும்போது, அன்பையே அதன் மையப்புள்ளியாக வைக்கிறார். "ஒருவரிலொருவர் அன்பாயிருங்கள்" (யோவான் 13:34) என்று அவர் நமக்குக் கட்டளையிடுகிறார். இந்தக் கட்டளையைப் பற்றி நாம் தொடர்ந்து வாசிக்கும்போது, இதில் இரண்டு முக்கியமான அம்சங்களைக் காணலாம். முதலாவதாக, இயேசு நம்மிடம் எவ்வாறு அன்பு கூர்ந்தார் என்பதை நமக்கு நினைவூட்டி, அதையே நாமும் பின்பற்றுமாறு கேட்டுக்கொள்கிறார். இரண்டாவதாக, இந்த உலகில் சீஷத்துவத்திற்கான ஒரு அளவுகோலாக அன்பையே அவர் முன்வைக்கிறார். இந்த அம்சங்களை நாம் விரிவாக ஆராய்வோம்.

ஒருவரிலொருவர் அன்புகூருவதன் மூலம் கிறிஸ்துவைப் பிரதிபலிக்க ஓர் அழைப்பு.

இயேசு கிறிஸ்து இவ்வுலகில் ஊழியஞ்செய்த காலம் முழுவதும் அன்பையே வெளிப்படுத்தினார்; அந்த அன்பு சாதாரணமான ஒன்றாக இருக்கவில்லை. அது சிலருக்கு விதிவிலக்கானதாகவும், ஒரு சிலருக்கு விசித்திரமானதாகவும், பலருக்குப் புரியாத புதிராகவும் (weird) இருந்தது. இருப்பினும், கிறிஸ்துவின் அந்த அன்பு அனைவரையும் திரும்பிப் பார்க்கச் செய்கிற அளவிற்கும், அசாதாரணமானதாகவும் இருந்தது; அது உலகத்தின் பசி, தாகம் மற்றும் நோய்களுக்கு மருந்தாக அமைந்தது. இயேசு தாழ்மையுடன் ஊழியம் செய்தார், ஒதுக்கப்பட்டவர்கள் மீது உருக்கமான அன்பு காட்டினார், மற்றவர்களுடைய துக்கத்தில் பங்கெடுத்து அனுதாபத்தை வெளிப்படுத்தினார், மேலும் பாவிகளை மன்னித்து அவர்களைத் தமது அன்பிற்குள் சேர்த்துக்கொண்டார். நம்முடைய வாழ்க்கையிலும் அதே அன்பைப் பிரதிபலிக்க இயேசு நம்மை அழைக்கிறார். அவருடைய அந்த அழைப்பு மிகவும் தெளிவானது. "நான் உங்களில் அன்பாயிருந்ததுபோல நீங்களும் ஒருவரிலொருவர் அன்பாயிருங்கள்" (யோவான் 13:34) என்று இயேசு கூறுகிறார்.

ஒருவரிலொருவர் அன்புகூருவதன் மூலம் உண்மையான சீஷர்களாக இருக்க ஓர் அழைப்பு.

ஒருவரிலொருவர் அன்பாயிருப்பதையே உண்மையான சீஷத்துவத்திற்கு ஓர் அளவுகோலாக இயேசு கிறிஸ்து வைக்கிறார். ஊழியம், ஒழுக்கம் மற்றும் விசுவாசத்தைக் காட்டிலும், அன்பையே சீஷத்துவத்தின் மையமாக அவர் அமைக்கிறார். நாம் அவருடைய சீஷர்களாகச் செழிப்பதற்கென்று இயேசு நமக்குக் கொடுக்கும் அந்த உறுதியைப் பாருங்கள். "நீங்கள் ஒருவரிலொருவர் அன்புள்ளவர்களாயிருந்தால், அதினால் நீங்கள் என்னுடைய சீஷர்களென்று எல்லாரும் அறிந்துகொள்வார்கள்" (யோவான் 13:35) என்று இயேசு கூறுகிறார். இந்த வாக்கியத்தில் உள்ள "இருந்தால்" என்ற வார்த்தையின் கனத்தை நான் அளவிட முயல்கிறேன். அதன் கருத்து மிகவும் தெளிவாக உள்ளது: 'நாம் இயேசு கிறிஸ்துவின் உண்மையான சீஷர்களாக இருக்க விரும்பினால், நம்முடைய கருத்து வேறுபாடுகள், பின்னணிகள், மனப்பான்மைகள் மற்றும் நம்பிக்கைகளுக்கு அப்பால், ஒருவரிலொருவர் அன்பு செலுத்துவதில் முதலில் நம் கவனத்தைச் செலுத்த வேண்டும்' என்று இதை நாம் மாற்றிச் சொல்லலாம்.

எனவே, இதுவே அந்தப் புதிய கட்டளை; இதுவே மிக உன்னதமான அழைப்பு - ஒருவரிலொருவர் அன்பாயிருப்பதன் மூலம் கிறிஸ்து இயேசுவைப் பிரதிபலிப்பதும், ஒருவரிலொருவர் அன்புகூருவதன் மூலம் கிறிஸ்துவின் உண்மையான சீஷர்களாகத் திகழ்வதும் ஆகும். இந்தப் புதிய கட்டளையானது ஒரு மகத்தான அழைப்பைக் கொண்டுள்ளது, அந்த அழைப்பு "ஒருவரிலொருவர் அன்பாயிருங்கள்" என்பதே. இன்றைய தியானத்தின் ஆரம்பத்தில் நாம் புரிந்துகொண்டது போல, ஒருவரிலொருவர் அன்பு செலுத்துவதற்குப் பெரும் முயற்சி தேவை என்பதை நாம் நினைவில் கொள்வோம். நாம் விழிப்புணர்வுடன் கிருபையுள்ளவர்களாகவும், மன்னிப்பவர்களாகவும், மற்றவர்களைத் தழுவி ஏற்றுக்கொள்பவர்களாகவும் இருக்க வேண்டும். அன்பு என்பது ஒரு மனித உணர்வாக இயல்பானதாக இருக்கலாம், ஆனால் கிறிஸ்துவின் அன்பைப் பின்பற்றுவது என்பது இயேசுவின் சீஷனாக நாம் எடுக்கும் ஒரு விழிப்புணர்வுடன் கூடிய உறுதிப்பாடாகும் (conscious commitment). ஒருவரிலொருவர் அன்புகூர வேண்டும் என்ற இந்த அழைப்பிற்கு நாம் கட்டுப்பட்டு, தேவனின் புதிய கட்டளையை ஏற்றுக்கொள்வோம்.

நம்முடைய தந்தையாம் கடவுளின் ஆசீர்வாதமும், மைந்தனாம் இயேசுக்  கிறிஸ்துவின் அன்பும் கிருபையும், பரிசுத்த ஆவியானவரின் சமூகமும் வழிநடத்துதலும், நம்மனைவரோடும் கூட இருந்து, நம்மை வழிநடத்துவதாக.

கிறிஸ்துவுக்குள் உங்கள் அன்பின்,

எபனேசர் பி. வீரசிங்கம்

"உம்மைப் போல மாறனும்"

by Jabez Dawnson